Aubixa Fundazioak hamargarren urteurrena ospatu zuen joan den irailaren 29an, Donostiako Udaletxeko Osoko Bilkuren Aretoan egindako ekitaldi batekin. Duela hamar urte, hain zuzen ere, leku berean aurkeztu zen ofizialki Fundazioa.
Urteurrena aukera izan zen hamarkada bateko ibilbidearen balantzea egiteko, Aubixa eraikitzen lagundu duten pertsonak aitortzeko eta datozen urteei begiratzeko, Fundazioak zahartze osasungarriago eta aktiboagoarekin, Alzheimerra eta bestelako gaixotasun neurodegeneratiboak dituzten pertsonen arretarekin eta haien familiei emandako laguntzarekin duen konpromisoari eutsiz.
Ekitaldiaren barruan, María Luisa Segoviano magistratuak eta Lourdes Pérez Rebollar kazetariak elkarrizketa interesgarria izan zuten, “Justizia zaintzen aurrean” izenburupean. Justiziaren, eskubideen eta zaintzen arteko harremana izan zuten hizpide, baita zaintza behar duten pertsonen eta zaintzen dutenen duintasuna eta eskubideak bermatuko dituen gizarte baterantz aurrera egiteko erronkak ere.
Ekitaldian Landarbaso Abesbatzak ere parte hartu zuen. Abesbatzaren lehen emanaldia izan zen Suediako Helsingborgen Musika Sakratuaren eta Musika Garaikidearen kategorietan urrezko bi domina berri eskuratu ondoren.
Hamar urte, pertsona askoren artean proiektu bat eraikitzen
“Aubixa pertsona askoren artean eraiki da” izan zen urteurreneko hitzaldiaren ideia nagusietako bat. Hamar urte hauek, zenbaki bat izatetik harago, sendotzen joan den ekimen baten ibilbidea irudikatzen dute; proiektuak iraun ahal izan du bertan sinetsi duten, ezagutza eta esperientzia partekatu duten eta proiektua bere egin duten pertsonei esker.
Fundazioak ospakizuna baliatu zuen bere ibilbidearen parte izan diren pertsonak bereziki aitortzeko eta jada gure artean ez daudenak gogoratzeko. Horien artean, Máximo Goikoetxea, Aubixaren sustatzaile nagusietako bat; Pilar Marco, Fundazioko lehen emakume presidentea; eta José Félix Martí Massóren ibilbidea. Azken horrek Pilar hil ondoren hartu zuen Fundazioaren presidentetza, eta joan den urtarrilean Donostiako Hiritar Merezimenduaren Domina jaso zuen.
Hamar urte hauetan, Aubixak zahartzearen, zaintzen eta gaixotasun neurodegeneratiboen inguruko hausnarketarako, ezagutzarako eta lankidetzarako espazioak sustatu ditu, diziplina, belaunaldi, erakunde eta gizarte-eragile desberdinen arteko elkarrizketa bultzatuz.
Hamargarren urteurrenaren ospakizuna etorkizunari begiratzeko aukera ere izan zen. Aubixak etapa berri honi tamainaz xumea den erakundea izaten jarraitzeko borondatearekin ekingo dio, baina ezagutza sortzeko, hausnarketa sustatzeko, diziplinen eta belaunaldien arteko zubiak eraikitzeko eta lankidetza pertsonen zerbitzura dauden proiektu bihurtzeko asmoarekin.
Sortu zenetik hamar urte igaro ondoren, Fundazioak bere ibilbidean bidelagun izan duen uste sendo bati eusten dio: “inork ez du gizartea bakarrik eraldatzen”. Horregatik, Aubixak lankidetzaren eta elkarrekiko ikaskuntzaren aldeko apustua egiten jarraituko du, pertsonak hobeto zainduko dituen gizartea eraikitzen laguntzeko.
Irailaren 29ko ekitaldia, azken batean, egindako bidearen ospakizuna izan zen, baina baita oraindik eraikitzeko dugun guztiarena ere: “Galderak izaten jarraitzen dugu. Proiektuak izaten jarraitzen dugu. Gogotsu jarraitzen dugu eta, batez ere, bidea elkarrekin egitea merezi duten pertsonekin jarraitzen dugu.”